O pasado 24 de outubro de 2020 celebrouse o Día das Bibliotecas baixo o lema «Bibliotecas, sempre ao teu carón», co fin de destacar o importante papel que xogan as bibliotecas ofrecendo acceso á cultura, ao coñecemento e ao entretemento en calquera lugar e circunstancia. Trátase, por tanto, de poñer en valor a capacidade de seguir ofertando servizos en circunstancias tan complexas como as que estamos a vivir.
Este curso 2020/2021, o lema das bibliotecas escolares de Galicia, «Xeografías lectoras na biblioteca escolar», quere poñer o foco nas posibilidades que ofrece a biblioteca escolar para a construción da persoa lectora a través das distintas actividades que programa e dos recursos que pon a disposición da comunidade educativa, que a ten sempre ao seu carón. En tempos tan confusos como os que estamos a vivir cómpre volver ás orixes, ao fundamental: as lecturas que nos convidan a viaxar, a explorar, a investigar…; lecturas que nos permiten chegar lonxe sen movernos da escola (ou da casa).