Primeira reunión do club de lectura de ESO

O 17 de outubro, no segundo recreo de Secundaria (12.55h-13.15h), tivo lugar na biblioteca a primeira xuntanza do club de lectura de 1º e 2º ESO. Supuxo todo un éxito, pois todos/as os/as alumnos/as de ambos cursos decidiron integrarse no noso círculo de lectores. Dado o elevado número de membros do club, nesta primeira reunión tomouse a determinación de realizar as lecturas e interpretacións das obras de maneira separada; favorecendo así a orde nas xuntanzas e o maior protagonismo e tempo de intervención de cada membro do grupo. Non obstante, o deseño e creación de actividades será sempre común e ambos grupos volverán a reunirse de maneira conxunta trala finalización da lectura e comentario de cada obra para planear e elaborar en equipo as tarefas derivadas de dita lectura.

Ademais, os membros do club decidiron, por unanimidade, achegarse á lectura en común e  á comprensión da obra de Manuel Lamas Camiño de Vilán durante o primeiro trimestre. Estes alumnos/as leron a primeira parte desta serie (Camiño de Caín) no segundo trimestre do curso 2017-2018 para preparar a visita do mencionado autor o 23 de abril do 2018, conmemorando así o Día do Libro. A fascinación polo escritor e a obra foi tal que optaron agora por abordar a segunda parte. Trala lectura e reflexións arredor dos elementos clave da obra (prediccións do contido a partir da contemplación da portada e do resumo que incorpora a contraportada, argumento, evolución dos personaxes,  interpretación propia, incidindo especialmente no seu sorprendente final…), deseñarase unha actividade conxunta arredor da Ruta do Faros e realizarase un roteiro literario do que vos informaremos puntualmente a través do noso blogue.

Anuncios

Xornadas de Portas Abertas

lectura Como vén sendo habitual, durante o mes de outubro, a nosa biblioteca organiza distintas sesións de formación de usuarios/as para o alumnado de Educación Infantil, Primaria e Secundaria. Non obstante, este curso, por primeira vez, convidamos ás familias a unhas Xornadas de Portas Abertas que se celebraron o mércores, 17 de outubro de 2018. Convocamos ás familias de Infantil e Primaria para as 16.30h e ás de Secundaria, despois da reunión cos titores respectivos, co obxectivo de amosarlles a nosa biblioteca e revisar con elas os fondos bibliográficos cos que contamos, facendo especial fincapé nos volumes para lectores adultos. A finalidade era ofrecerlles a posibilidade de obter o seu propio carné de usuario/a e acudir á biblioteca para levar libros en empréstito. Conforme as familias se animen a visitar a biblioteca con asiduidade, adquiriranse fondos axeitados aos seus intereses e gustos, pois prestaremos especial atención ás suxerencias que profesorado, pais e nais nos transmitan para contar así cun amplo surtido de obras aptas para lectores adultos.

A experiencia deu xa os seus primeiros froitos, pois o mesmo día en que se celebraron as Xornadas catro pais e nais amosaron o seu interese por formar parte dos/as usuarios/as da nosa biblioteca, solicitando o seu carné nese momento.

Así mesmo, durante a reunión inicial, realizouse coas familias un percorrido pola biblioteca coa explicación conseguinte arredor dos distintos recunchos cos que contamos e sobre a enumeración dos servizos que ofrecemos.

Ademais, comentouse cos pais e nais a selección do tema anual da biblioteca para o curso 2018-2019: a tradición conectada coa sabiduría popular da localidade a través da indagación sobre os festexos que se conmemoran na zona, os cultivos, a literatura oral…, solicitando a súa colaboración para as distintas actividades e proxectos que se leven a cabo ao longo do curso arredor deste tema.

 

 

Sesión de formación de usuarios 1º ESO

O alumnado de 1º ESO achegouse á biblioteca do CPI de Zas para repasar as normas que rexen o regulamento deste espazo e para preparar un vídeo de presentación dos servizos e actividades que a biblioteca oferta para os/as seus/súas usuarios/as. Podedes acceder a el desde a seguinte ligazón:

Moitas grazas a todos/as os/as estudantes de 1º ESO pola súa inestimable colaboración.

 

Día das Escritoras (15 de outubro)

O 15 de outubro celébrase o Día das Escritoras como forma de recordar e potenciar a excelente calidade literaria de tantas autoras e artistas que enriqueceron o legado cultural universal. Unha boa maneira de homenaxear a estas figuras imprescindibles da literatura de todos os tempos é acudir á nosa biblioteca a botarlle un vistazo á compilación de obras escritas por mulleres que preside desde hoxe a nosa área de exposicións. Nela non faltan autoras representativas da literatura infantil e xuvenil e responsables de obras mestras da literatura galega, castelá e universal. É o caso de Rosalía de Castro, Fina Casalderrey, Concha Blanco, Ledicia Costas, María Reimóndez, María Victoria Moreno, María Solar, María Gripe, Marina Mayoral, Marilar Aleixandre, Emilia Pardo Bazán, Gloria Fuertes, Elvira Lindo, Laura Gallego, Isabel Allende, Jane Austen, Charlotte Brontë, Ana Frank…

Non deixedes de visitar a nosa exposición e de animarvos a ler algunha destas obras ou das moitas outras escritas por mulleres que abundan na nosa biblioteca.

 

Proxecto sobre a auga na sección bilingüe de 6º EP

O alumnado da sección bilingüe da área de Ciencias da natureza de 6º de Educación Primaria participou neste proxecto realizando traballos sobre a separación de mesturas con auga, en concreto, a evaporación, a filtración, a destilación e a decantación.

Despois de facilitarlles a terminoloxía específica en inglés, confeccionaron uns murais destes catro métodos de separación de mesturas que expusemos na cortiza da aula, baixo o título WATER MIXTURES. Aquí deixo algunhas fotos nas que se aprecia o seu esforzo polo traballo ben feito:

Tamén gravamos un vídeo no que o alumnado de 6º desta sección bilingüe explica en inglés a separación de mesturas con auga. Se queredes acceder ao contido do vídeo, podedes escanear este código QR:

7

Queremos amosarlle o noso agradecemento á profesora de Bioloxía María Vila, que se ofreceu a levarnos ao laboratorio para que puideramos ver como alumnado de 4º de ESO facía a separación de mesturas. Ademais dos procesos que xa traballaramos na aula, explicáronnos outros que non coñeciamos, como o da cristalización. Tamén queremos agradecerlle ao alumnado de 4º da ESO que explicasen dunha maneira tan sinxela todos estes procesos, non carentes de dificultade. Recordade con estas fotos o ben que o pasastes ese día e o moito que aprendestes:

 

E para rematar, so lles direi unha palabra aos meus little scientists por facerme tan doada esta experiencia de traballar con eles as Ciencias da natureza en inglés:

THANKS!

Gloria Lema.

Últimas actividades dos clubs de lectura de 6º EP e 1º ESO

            Durante o terceiro trimestre, os membros do club de lectura de 6º EP e 1º ESO leron de maneira conxunta a obra de Ledicia Costas A señorita Bubble. Unha vez rematada esta, dividíronse en pequenos grupos para a realización das actividades seleccionadas por eles/as a partir dos eixes temáticos plantexados na obra. O 18 de xuño, de 14.25h a 15.10h, o alumnado de 1º ESO reuníuse na biblioteca do centro cos seus compañeiros/as de 6º EP para expoñer estes traballos. Así, os estudantes de 6º EP prepararon unha magnífica representación de monicreques deseñados por eles mesmos/as, recreando os personaxes e a historia ideada na novela.

            Pola súa parte, Andrea Solís, Borja Canay e Hari Singh (1º ESO) prepararon as súas respectivas exposicións orais sobre as súas mascotas, inspirándose para iso no amor que a señorita Bubble sente por Nefertiti, a súa gata semimecánica. Á súa vez, para coñecer mellor a figura histórica que se atopa detrás do seu nome, as alumnas Lorena Martínez e Noelia Pose (1º ESO) decidiron indagar sobre a vida da coñecida faraoa exipcia e establecer as concomitancias entre ela e a gata da novela. Nefertiti non é a única referencia a un personaxe histórico que aparece na obra. O personaxe de Vicent, fillo adoptivo da señorita Bubble, agacha outro guiño a un famoso representante, nesta ocasión, da arte, como é o caso de Vicent Van Gogh. Para averiguar os vínculos entre ambos, as dúas alumnas prepararon unha investigación e posterior exposición oral sobre o coñecido pintor e as motivacións de Ledicia Costas para converter parte das súas características nun personaxe de ficción.

            Por outro lado, a personalidade da señorita Bubble inspirou outras investigacións dirixidas a coñecer mulleres científicas e grandes inventoras coma a protagonista da novela. Por iso, Tania Pose (1º ESO) tomou a determinación de escoller a outra muller relevante neste ámbito para dar a coñecer a súa traxectoria. Seleccionou a Marie Curie pola súa relevancia, non só campo científico, senón tamén por ser a primeira muller en recibir dous premios Nobel en distintas especialidades, a Física e a Química, substancias ambas tan importantes na labor investigadora da señorita Bubble.

Bubble 16

            Ademais destes traballos contextuais arredor da novela, outros/as alumnos/as decidiron cubrir coas súas propias aportacións algúns ocos que a autora deixou no aire. É o caso da apariencia da señorita Bubble, que perdeu un ollo no pasado. Por iso, Adrián Rama e Brayan Pensado (1º ESO) redactaron a súa propia versión do accidente da protagonista.

            Finalmente, Cristina Lorena Soto e Nerea Herrero (1º ESO) realizaron unha reseña completa da obra, indicando non só as liñas argumentais da novela senón tamén a súa recomendación para o resto dos compañeiros/as.

 

Novo número da revista ZasCandil

O equipo de Dinamización da Lingua Galega acaba de editar o número correspondente ao curso 2017-2018 da nosa revista escolar, ZasCandil. A publicación vén plagada de artigos sobre os distintos proxectos e saídas culturais levadas a cabo ao longo destes meses, ademais das imaxes máis representativas do noso alumnado e o seu traballo, xunto con emotivas entrevistas e textos agarimosos adicados a aqueles docentes que se despiden de nós ao finalizar este curso. Podedes acceder a el dende a seguinte ligazón: http://online.fliphtml5.com/vnlvz/ndys/

Non queremos deixar pasar a oportunidade de agradecer ao equipo de Dinamización lingüística do centro e á súa coordinadora Cristina Palleiro o magnífico labor de compilación realizado e o intenso esforzo destes meses, que deu lugar a un excelente resultado final. Parabéns!

Desfrutade da súa lectura e dos magníficos recordos que compartimos este ano escolar!

 

Proxectos sobre a electricidade de 5º EP

O alumnado de 5º EP, xunto coa súa titora Sandra, preparou uns magníficos proxectos inspirados en distintos faros, praias e outras paraxes naturais para dar a coñecer o funcionamento da enerxía eléctrica. Non perdades a oportunidade de achegarvos á biblioteca para visitar esta instrutiva exposición e aprender un pouco máis sobre esta fonte enerxética.

Grazas ao alumnado de 5º EP por compartir connosco o froito do seu traballo!

Proxectos lingüísticos sobre a auga

O alumnado de 2º ESO, guiado pola súa profesora Ana García, preparou por grupos tres traballos na materia de Lingua castelá arredor da familia léxica do termo “auga”, o seu campo asociativo e o semántico. Os proxectos atópanse expostos na biblioteca. Animádevos a vir visitalos e a descubrir as múltiples posibilidades lingüísticas que ofrece este vocablo.

Recomendacións literarias para o verán

Agora que se achega o fin de curso, o equipo da biblioteca non quere deixar pasar a oportunidade de lembrarvos que o verán é unha época ideal para retomar lecturas ou iniciar outras novas. Para facilitarvos esta tarefa, dende a seguinte ligazón, podedes acceder a unha serie de recomendacións literarias por idades que preparamos especialmente para vós: Tríptico recomendacións verán 2018

Ademais, nos vindeiros días, chegarán á biblioteca as últimas novidades adquiridas en literatura infantil e xuvenil. Animámosvos a botarlles un vistazo. Son as seguintes:

  1. Makinaria, de Carlos Negro.

Makinaria

2. Camiño de Vilán, de Manuel Lamas.

3. Engurras, de Paco Roca.

Engurras

4. Un monstro vén a verme, de Patrick Ness.

un monstro ven a verme

5. Esmeraldina, a pequena defunta, de Ledicia Costas.

esmeraldina

6. Dragal 1. A herdanza do dragón, de Elena Gallego.

dragal

7. As aventuras de Pelusa, de Xelucho Abella.

8. O misterio do Faro Vello, de Fina Casalderrey.

faro

9. O misterio da Casa do Pombal, de Fina Casalderrey.

pombal

10. Un baúl cheo de piratas, de Ana Rossetti.

baul

11. Os nenos da varíola, de María Solar.

nenos

12. O curioso incidente do can a media noite, de Mark Haddon.

can

Recordade que podedes levar ata un máximo de seis libros para casa, que teredes que devolver en setembro. Para iso, é necesario que as vosas familias cubran o impreso co compromiso de devolución. Na parte de atrás do documento, debedes anotar os títulos das obras que solicitades en préstamo e entregalo a un membro do equipo da biblioteca.