Actividades do club de lectura de Ciencias da Natureza (1º ESO)

A profesora de Bioloxía do centro, María Vila, inaugurou este curso o club de lectura de Ciencias da Natureza cos quince alumnos/as de 1º ESO. Ao longo este período, traballaron sobre a obra de Ledicia Costas O corazón de Xúpiter, dado que aborda o tema da astronomía, un dos eixes principais da materia de Bioloxía. Ademais, a novela plantexa outros dous temas que é necesario estudar coa rapazada para tratar de erradicalos, debido á perigosidade que supoñen para os adolescentes: o grooming (acoso a menores a través de internet por parte de adultos) e o bullying.

María Vila decidiu plantexar o club de lectura como un taller teórico e práctico á vez, no cal se foron desenvolvendo diferentes actividades. Dende o primeiro día se repartiu, de forma aleatoria, ao grupo en catro equipos (de tres e catro alumnos/as) que, ao longo das sesión, se ían rotando.

O primeiro grupo recibiu o nome de “Os lectores de historias” e era o encargado de ler en voz alta os diferentes capítulos do libro, mentres que o resto do alumnado realizaba outras tarefas.

1

O segundo grupo foron “Os buscadores de mitos”, que se encargaban de facer unha búsqueda pola web sobre as diferentes constelacións, así como de realizar unhas fichas de información científica e mitolóxica das que se lles proporcionou o modelo. Conseguiron elaborar unha gran cantidade de fichas.

Os membros do terceiro grupo eran “Os pintores do Universo” e foron os encargados de pintar de negro o corredor que une o hall da 2ª planta co laboratorio de Ciencias. O obxectivo era simular o Universo no que se situarían as diferentes constelacións, xunto co Sistema Solar. Debido a que o volume de traballo era considerable, precisaron a axuda do alumnado da materia de 4º ESO de Ciencias Aplicadas; e aínda así, foi imposible rematalo, co que se pretende continuar de cara ao curso que vén.

4

En canto ao cuarto equipo, déuselle o nome de “A banda das estrelas” e foron os encargados de troquelar en gomaeva estrelas de diferentes tamaños, pintalas con tinta fosforescente, que brilaba na escuridade, e de pegalas sobre chinchetas para despois cravalas na parede e unilas con fío, simulando as diferentes constelacións.

5

Outra das actividades realizadas foi o visionado de diferentes vídeos sobre os outros temas do libro (o grooming e o bullying). Posteriormente, realizáronse debates para coñecer a opinión e as vivencias persoais do alumnado en relación con estes aspectos.

Foi unha experiencia moi positiva, que requeriría de máis tempo e na cal os rapaces e rapazas preguntaron todo aquilo que lles plantexaba calquera dúbida. É unha iniciativa a repetir, xa non só polo fomento da lectura, senón polos momentos compartidos co alumnado.

Anuncios

Booktrailer de “Camiño de Vilán”

Os membros do club de lectura de 1º ESO prepararon un booktrailer arredor da obra Camiño de Vilán, de Manuel Lamas, novela á que se achegaron durante o primeiro trimestre. As alumnas Lara Fernández, Zaira Fondo e Tatiana Recarey redactaron o guion, que foi interpretado por: Valeria López (como Alba, a protagonista); Isaac Domínguez (no papel do misterioso asasino); Anxo Souto (como Iago, o ex-noivo de Alba); David Castro (recreando a Antón, a nova parella da protagonista); Carme Osende (como Mucha, amiga de Alba); Adriana Otero (no rol de Elisa, outra das amigas de Alba) e Zaira Fondo (voz en off). O resto dos integrantes do club actuaron como extras. Pola súa parte, Nicolás Quiñoy (4º ESO) encargouse da gravación, realización, edición e montaxe do material audiovisual.

Moitas grazas a todos/as pola vosa colaboración e esforzo, que culminaron neste magnífico traballo final!

Roteiro literario “Volverás, golfiño”

Os membros integrantes do club de lectura de 1º e 2º ESO leron durante o terceiro trimestre a novela de Andrea Maceiras Volverás, golfiño, cuxa acción transcorre en varios dos escenarios máis coñecidos na historia dos naufraxios da Costa da Morte: Camelle, Camariñas, o Cemiterio dos Ingleses e Cabo Vilán. Dada a proximidade da nosa comarca con estes lugares, os clubs de lectura das bibliotecas do CPI de Zas, do IES Maximino Romero de Lema (Baio) e do IES Fin do Camiño (Fisterra) decidiron abordar ao mesmo tempo a revisión e comentario da obra para poder organizar de forma conxunta un roteiro literario que abranguese as localizacións antes citadas.

O día escollido para dito roteiro foi o pasado luns, 27 de maio. Saímos do centro ás 10.10h para reunirnos ás 11h cos compañeiros/as dos outros dous centros no Museo de Man, de Camelle, onde deu comezo a nosa xornada. As guías do museo déronnos cumprida información sobre a fascinante vida, personalidade e obra de Manfred, o alemán de Camelle, que legou ao pobo que o acolleu durante máis de trinta anos toda a súa producción artística, hoxe no museo que leva o seu nome. A visita incluíu tamén un paseo ata o súa antiga casa, situada no dique do pobo, que aínda conserva, no seu exterior, restos do seu extraordinario xardín escultórico.

A continuación, o grupo desprazouse ata o Cemiterio dos Ingleses, outro dos escenarios claves da obra, para visitar logo o faro de Vilán e rematar a súa andaina no merendeiro de Xaviña, antes de regresar aos nosos respectivos centros. Tanto no Cemiterio dos Ingleses coma no faro, o alumnado aproveitou para reflexionar sobre as partes da novela que alí acontecían e para ler en voz alta para os seus compañeiros/as as pasaxes máis significativas que transcorrían nestes lugares, tal e como podedes aprezar nas imaxes.

Exposición Banksy

O alumnado de 4º ESO da materia de EPV, dirixido polo seu profesor Nacho Pascual, realizou una magnífica exposición con reproduccións feitas por eles/as mesmos/as das obras máis coñecidas do misterioso artista urbano Banksy. Os/as estudantes emularon a súa técnica, chamada “estarcido”, que consiste no emprego de plantillas, coa imaxe previamente recortada, que se colocan sobre a superficie escollida, para aplicar logo unha ou varias capas de pintura en spray.

Parabéns ao alumnado de EPV de 4º ESO e ao seu profesor Nacho Pascual polo seu extraordinario talento.

Non deixedes de acudir á biblioteca para aprezar de primeira man esta exposición!

Celebración das Letras Galegas 2019 en Secundaria

O pasado xoves, 16 de maio, dende as 11h e ata as 13.15h, a biblioteca do CPI de Zas acolleu diversas actividades de gamificación arredor da figura e da obra de Antonio Fraguas para conmemorar o Día das Letras Galegas 2019. Ditas actividades foron ideadas e deseñadas polos profesores Carmen Regueira, Javier Carballo e Ana Porteiro. Ademais, contaron coa colaboración do resto dos docentes de Secundaria, tal e como iremos indicando a continuación.

Nos días previos á realización das actividades por parte do alumnado da ESO, Carmen Regueira preparou tres probas de gamificación para cada curso da ESO. Así, 1º e 4º ESO enfrontáronse en primeiro lugar á descodificación dunha mensaxe cifrada que aportaba a cada grupo o primeiro dos catro números que debían identificar para acceder ao premio final. A segunda proba que debían resolver era unha sopa de letras que os conducía a unha das obras do autor que se atopaban estratexicamente diseminadas pola biblioteca. Dentro de cada obra, atopábase outra mensaxe sobre a que debían aplicar papel celofán vermello para poder localizar o segundo dos números. Para o achádego da terceira e cuarta cifras, cada grupo gañador tiña que esperar á proba final, que habían de realizar todos xuntos.

Pola súa parte, 2º e 3º ESO tiveron que descodificar tamén unha mensaxe cifrada con códigos distintos aos dos grupos anteriores e localizar nun labirinto o título da obra de Antonio Fraguas que lles daría o segundo dos números que precisaban.

A terceira proba consistía na identificación de dúas cifras que debían multiplicarse e se atopaban nos orificios de dúas das portadas das obras de Fraguas por unha parte e, por outra, na localización doutros dous números escritos, nesta ocasión, nun papel en branco cun bolígrafo de tinta invisible. Para ubicalos, os integrantes dos grupos correspondentes contaban con cadansúa lanterna de luz ultravioleta.

Todas estas actividades aparecen descritas na seguinte dirección de Google Sites, creada polo profesor Javier Carballo: https://sites.google.com/s/17m-KeZCZmQbqPy421mrS_MB2Khu4conP/p/14IzTYpg-9OhVt64N70nB1Y-kyQoZGyt3/edit

O día 16 de maio, cada curso da ESO desprazouse ata a biblioteca, onde foron recibidos polo profesor Ángel Monroy, caracterizado para a ocasión coma se de Antonio Fraguas se tratase, e por Carmen Regueira, disfrazada de astróloga, facendo referencia á obra Do tempo e dos astros, do autor homenaxeado nas Letras Galegas. Tras a contextualización inicial, o alumnado de cada curso foi dividido en catro pequenos grupos. Sobre as mesas correspondentes, puideron atopar tres sobres coas probas que debían realizar. Carmen Regueira, pola súa parte, situouse na mesa central para atender as peticións de axuda do alumnado. Para iso, contaba con cinco cartas que estaban viradas cara abaixo. O portavoz de cada grupo debía elixir entre elas. Dúas eran fadas protectoras que lle outorgaban unha axuda directa. Outras dúas contiñan un signo de interrogación. Se estas eran as seleccionadas, para obter dita axuda, o grupo debía resolver unha pregunta arredor da figura de Antonio Fraguas dende os distintos ámbitos do coñecemento. O portavoz podía elixir entre as materias de Ciencias, Matemáticas, Xeografía e Historia, Inglés ou Lingua galega e castelá. Estas preguntas foron deseñadas polos profesores das diferentes asignaturas: María Vila, Ana Pensado, Alexandre Soto, Mercedes Garrido, Ana Porteiro e Ana García. Tamén Nacho Pascual colaborou na decoración das portadas e na elaboración dos debuxos e retratos de Antonio Fraguas. Finalmente, a última carta contiña un trasno. Se esta era a escollida, cada grupo debía enfrontarse a un minuto de inactividade.

Cada curso aproveitou ao máximo os vinte minutos de tempo que se lles deron para superar as dúas primeiras probas. Finalmente, reuníronse todos os grupos na biblioteca para colaborar na identificación das dúas últimas cifras que abrían dous cofres misteriosos. Un deles outorgáballes a indicación da aula onde se atopaba o seu premio e outro contiña a chave que a abría. O premio común consistiu nun doce aperitivo para todos os membros de Secundaria.

Visita a Primaria de “Polo correo do vento” (EDLG)

O pasado luns, 13 de maio, ás 10h da mañá, o alumnado de Educación Primaria do CPI de Zas contou coa presenza do escritor Enrique Mauricio e o ilustrador Carlos Taboada. Ambos prepararon unha sesión de contacontos e un obradoiro de debuxo arredor do seu libro A detective Peregrina e o insólito caso “Antón Fraguas”, autor este último ao que, como sabemos, se lle adicou o Día das Letras Galegas 2019.

Para volver a desfrutar dos momentos compartidos con estes dous artistas que reciben o nome de “Polo correo do vento”, non deixedes de acceder ao seguinte vídeo preparado por Cristina Palleiro, coordinadora do Equipo de Dinamización Lingüística do noso centro e á que queremos agradecerlle unha vez máis o seu intenso traballo a prol das actividades de dignificación e consolidación da lingua galega.

Actividades de gamificación arredor das Letras Galegas en Infantil e Primaria

O alumnado de Educación Infantil e Primaria celebrou o Día das Letras Galegas, adicado á figura de Antonio Fraguas, cunha serie de actividades de gamificación. Para xerar a  expectación necesaria nos/as estudantes, preparouse un vídeo motivador, así como unas cantas pistas que se diseminaron polo centro:

No caso de Educación Infantil, o fío condutor destas tarefas xirou arredor da cantiga e o conto “O piollo e a pulga”:

No caso de Primaria, partiuse dun suposto roubo de obxectos valiosos no Museo do Pobo Galego. Para resolver este misterio e recuperar os materiais perdidos, no primeiro ciclo, contaron coa axuda da detective Peregrina, personaxe de ficción dunha das obras inspiradas na traxectoria profesional de Antonio Fraguas co gallo da celebración das Letras Galegas (A detective Peregrina e o insólito caso “Antonio Fraguas”). Pola súa parte, no segundo e terceiro ciclos, introduciron a presenza de seres mitolóxicos galegos (os tardos ou os biosbardos) como cómplices deses roubos:

Ademais, o alumnado de Primaria preparou tamén unha regueifa sobre a vida de Antonio Fraguas:

 

O “Robot Pintor”

O alumnado de Robótica do CPI de Zas, dirixido polo seu profesor Javier Carballo, elaborou uns orixinais robots compostos duns rotuladores na súa parte inferior que lles imprimen a capacidade de debuxar círculos de cores durante o seu desprazamento sobre un circuito ou taboleiro. Estes extraordinarios produtos atópanse expostos no recuncho de robótica da nosa biblioteca. Non deixedes de achegarvos para desfrutar da habilidade dos/as nosos/as estudantes e do seu profesor de Tecnoloxía e Robótica.

Velaquí tedes unha demostración do funcionamento dos robots no laboratorio de Tecnoloxía:

E a comprobación final sobre o taboleiro que se atopa na biblioteca:

Moitas grazas ao noso compañeiro Javier Carballo polas constantes, valiosas e creativas contribucións que realiza á nosa biblioteca!

Encontro literario con Eva Mejuto

Para celebrar o Mes do Libro, o CPI de Zas recibiu a visita de Eva Mejuto, autora da novela xuvenil 22 segundos, que mantivo un encontro literario co alumnado de 1º e 2º ESO, membros do club de lectura de Secundaria, e tamén cos seus compañeiros/as de 3º e 4º ESO. Os primeiros achegáronse a esta obra durante as sesións do club de lectura do segundo trimestre, mentres que os demais analizaron a novela na materia de Lingua galega.

O encontro coa autora tivo lugar o 29 de abril, de 11.15h a 12.55h, na aula de audiovisuais do centro. A sala foi decorada para a ocasión coas magníficas caricaturas de Eva Mejuto que realizaron os estudantes de 3º ESO, seguindo as expertas instrucións do seu profesor de EPV, Nacho Pascual.

O evento foi presentado por Isaac Domínguez (1º ESO) e Tania Pose (2º ESO), que recordaron aos asistentes a traxectoria profesional e literaria de Eva Mejuto, e deron paso ao seguinte vídeo compilatorio, que proxectaron Nicolás Quiñoy e Unay Domínguez (4º ESO):

A continuación, Tania e Isaac presentaron a ronda de preguntas preparadas polo resto do alumnado, ás que Eva contestou con grande luxo de detalles, anunciando, ademais, que xa está preparada a segunda parte de 22 segundos. Houbo tempo tamén para falar da súa última novela, Memoria do silencio, ambientada na II Guerra Mundial, e da súa faceta como adaptadora de contos tradicionais a álbums ilustrados. A escritora asegurou que combina ambas facetas con facilidade e pracer, pois tanto a comunicación cos máis cativos como co alumnado de maior idade lle resulta sumamente gratificante.

Esta visita circunscríbese no programa “Encontros literarios”, promovido pola Subdirección Xeral de Promoción do Libro, a Lectura e as Letras Españolas, pertencente ao Ministerio de Cultura e Deporte.

 

Troco solidario no Mes do Libro

Ao longo do mes de marzo, a biblioteca do CPI de Zas convidou ao alumnado a doar libros e xogos de mesa en bo estado que tivesen na casa pero que xa non utilizasen ou non quixesen conservar. Recibiuse un bo número de exemplares que se reservaron para expoñer nun dos nosos stands durante o Mes do Libro, co fin de preparar un troco literario. Para iso, clasificáronse as obras outorgándolles dous tipos de prezos simbólicos: un quilo ou unidade ou ben dous quilos ou unidades de alimentos non perecedoiros ou produtos de hixiene, segundo a actualidade de cada libro ou xogo.

Os/as alumnos/as poden visitar a exposición durante os recreos de Primaria e Secundaria, elixir as obras que lles interesen e proceder á súa compra entregando a cambio o importe en especie marcado en cada unha delas. Os alimentos e produtos recadados serán destinados aos Servizos Sociais do Concello de Zas.

Moitas grazas a todos/as pola vosa colaboración.